የዋልያዎቹ አንድ ተጫዋች በሰርግ ምክንያት ከብሄራዊ ቡድኑ ተሰናብቷል

የዋሊያዎቹ አሰልጣኝ ውበቱ አባተ ከመረጣቸው 36 ተጨዋቾች ሽመልስ በቀለን ጨምሮ ከቀሩት 27 የቡድኑ አባላት መካከልበረከት ደስታ አንዱ ሲሆን ነገር ግን ፍቃድ አግኝቶ ወጥቶ እያለ በተፈቀደለት ጊዜ ባለመመለሱ ምክንያት ከቡድኑ ሊሰረዝ መቻሉ ታውቁአል

ከ27 ተጨዋቾች 4ቱ የሚቀነሱ በመሆኑ በረከት ከተቀናሾቹ መሃል ይሁን አይሁን የታወቀ ነገር አልነበረም ትልቅ አገራዊ አጀንዳ ላይ የተጠራው ተጨዋቹ ግን ከሰአታት በፊት በደረሰኝ መረጃ በሰርግ ምክንያት ከካፍ አካዳሚ ከሚገኙት ተጨዋቾች ውጪ ሆኗል፡፡

መጀመሪያውኑ የተቀነሱት ተጨዋቾች ዝርዝር ከመታወቁ በፊት ተናግሮ ቢሆን ኖሮ በሱ ቦታ ከተቀነሱት ተጨዋቾች አንዱ ይቀር ነበር በማለት የበረከትን ድርጊት የስፖርት ቤተሰቡ ተችቷል፡፡ ቡድኑ ህዳር 4 ኒጀርን ገጥሞ የሚመለሰው ህዳር 6 ሲሆን ይህም ቀን የበረከት የሰርጉ ቀን መሆኑ ታውቋል፡፡

ከታማኝ ምንጭ በተገኘ ሌላ የበረከት መረጃ ሰኞ ዕለት ወደ አዳማ ሄዶ ማክሰኞ ምሽት 12 ሰአት ለመመለስ በአሰልጣኝ ውበቱ አባተ ፍቃድ አግኝቶ ከአካዳሚው ከወጣ በኋላ በተባለው ሰአት ባለመመለሱ አሰልጣኙ ደጋግሞ በእጅ ስልኩ ላይ ቢደውልም በረከት ምላሽ አለመስጠቱ አሰልጣኙን አበሳጭቷል፡፡

ተጨዋቹ ዛሬ ጠዋት ሲደውል በአሰልጣኙ መመለስ እንደማይችል መቀነሱ እንደተነገረውና በዚህ የዲሲፕሊን ጥሰትም ከቡድኑ መባረሩ ታውቋል፡፡

ምናልባት ሲደወልለት ያላነሳው ከ27ቱ ቀሪ ተጨዋቾች መሃል እሆናለሁ የሚል እምነትም ስላልነበረው ይሆናል የሚልም ግምት አለ፡፡ ዋሊያዎቹ በቀናቶች ውስጥ ደግሞ ቀሪዎቹ አንድ ግብ ጠባቂና ሁለት ተጨዋቾች ቀንሰው ጠንካራ ልምምዳቸውን ይቀጥላሉ ተብሎ ይጠበቃል ስትል ሀትሪክ ስፖርት ጋዜጣ ዘግባለች፡፡