በስፔን ሲቭያ የተካሄደው የማራቶን ውድድር በሁለቱም ፆታ ኢትዮጵያውያን ድል ቀንቷቸዋል።

▪️እ.ኤ.አ ከ1985 ጀምሮ በሲቭያ ጎዳናዎች መካሄድ የጀመረው ይህ ማራቶን ዘንድሮ ለ 37ኛ ጊዜ በስፔን ሲቭያ ከተማ ተካሂዷል። በሴቶች በተካሄደው የማራቶን ውድድር አለሙ መገርቱ የግሏን ምርጥ ሰአት 2:18:51 በመግባት በቀዳሚነት ውድድሯን ስታጠናቅ ባሳለፍነው አመት ህዳር ወር በባርሴሎና 2:24:09 እንደ ምርጥ የግል ሰአቷ ሆኖ የተመዘገበላት መሰረት ጎላ 2:21:10 በመግባት 2ኛ ደረጃን ይዛ አጠናቃለች። የግሏን ምርጥ ሰአትም ማሻሻል ችላለች። ሌላዋ ኢትዮጵያዊ ካላዩ ቸኮል 2:21:17 በመግባት 3ኛ ደረጃ ይዛ አጠናቃለች።

▪️በወንዶች በተካሄደው የማራቶን ውድድር ጥሩ ፉክክር የታየበት ሲሆን ኢትዮጵያዊው አስራር አብዱራህማን 2:04:43 በመግባት በአንደኝነት ውድድሩን ሲያጠናቅቅ የቦታውንም አዲስ ሪከርድ ማስመዝገብ ችሏል። በዚህ ውድድር ለመጀመሪያ ጊዜ የተካፈለው ሌላው ኢትዮጵያዊ አደላድለው ማሞ 2:05:12 በመግባት 2ኛ ደረጃን ይዟል። የ2015 የአለም አትሌቲክስ አሸናፊው ኤርትራዊው አትሌት ግርማይ ገ/ስላሴ  አደላድለው ከገባበት ሰአት 22 ሰከንዶች በመዘግየት 3ኛ ደረጃን ይዞ ውድድሩን አጠናቋል።

ፈለቀ ደምሴ።